والكلام عن التعليم…
لو فكرت في فكرة المدارس والتعليم (ومش عندنا بس) هتلاقي حاجات أبعد ما تكون عن “تخريج أفراد فاعلين في مجتمعهم”، هو الحقيقة بيخرج ترس جديد في المكنة الكبيرة. حاجة كده متفصلة عشان تناسب احتياجات وعادات وتقاليد وثقافة وتوجهات سياسية خاص بالمجتمع ده… لكن هدفه مش تخريج واحد فكره “حر” أو فاهم.
بغض النظر عن عباقرة التاريخ والعلماء والمفكرين وغيرهم من اللي أثروا التاريخ الإنساني، بس مازالت منظومة التعليم في العالم “معلبة”.
يعني مثلا.. في العصر الحالي
كل يوم، بل كل ساعة فيه اكتشاف او ابتكار او اختراع جديد، ومع ذلك هتلاقي المناهج بتقعد سنين لغاية ما تتجدد ويتعاد النظر فيه، ويفضل الطلبة اللي بيدرسوا واقفين عند نفس النقطة اللي هي تاريخ إصدار المنهج اللي بيدرسوه.. طيب فين الجديد؟! هيوصلوله ويعرفوه امتى؟! وفِي الأخر، ولأسباب كتير، بيحفظوا بس، وبالتالي وبينسوا بعد الامتحان بدقيقتين… لأن مفيش أي deep learning قايم على الخبرة والتجربة الشخصية!
الأوامر..
الطالب الكويس هو “اللي بيسمع الكلام” قوم.. أقف .. اسكت.. احفظ، مفيش اي free will خالص، هو بيعمل ما يؤمر بِه، ومالوش أي صلاحية أو أهلية عشان يقول رأيه ولو حصل بيبقى بمبدأ “قول اللي انت عايزه واحنا نعمل اللي احنا عايزينه”، أو “أنت مين يا مفعوص عشان تقول رأيك؟”… شغل أبوي متوارث!
دول حاجتين بس من حاجات كتير موجودة في نظم التعليم الحالية متخليهاش مناسبة للوقت اللي احنا فيه بأي شكل، ولو مناسبة لحاجة، فهي مناسبة للأهداف اللي كتبتها في أول كلامي.
بتخيل لو المدارس من خمس سنين لغاية الثانوي عاملة زي المعرض والفصول ستاندات جوا المعرض ده والأولاد هما اللي يختاروا بنفسهم هيتعلموا ايه النهاردة من وسط المجالات الموجودة، وتقييم المستوى ممكن يبقى بمليون حاجة غير نظام الامتحانات والواجبات العقيم، وليكن بقياس الأداء جوا الفصل وتفاعله وفهمه للي بيعمله مش “حفظه”! ومن غير ما يتفرض عليه باكدج مواد هو مش عايزها بس بياخدها زي ماهي كده… عافية!
* * *
«العقلية التي تصدق أي اكتشاف، هي عقلية غير قادرة على التوصل لأي اكتشاف!» نظم التعليم في مصر تنجب أجيالًا ممن يصدقون أي شيء.
كتاب: شربة الحاج داوود
أحمد خالد توفيق
التعليم في فنلندا
تعالوا ناخد نظام التعليم الفندلندي كمثال للتعليم الكويس
1- مفيش دراسة قبل ما الطفل يبلغ 7 سنين.
2- نادر “جدا” إن يبقى فيه امتحانات أو واجبات منزلية بالذات في السنين الأولى.
3- أصلا أول 6 سنين من التعليم مفيهومش أي تحديد للمستوى
4- فيه إمتحان واحد بس لكل الطلبة في فنلند ده بيبقى والطالب عنده 16 سنة.
5- كل الأطفال بإختلاف مستوى ذكائهم بيقعدوا مع بعض في نفس الفصل.
6- 66% من الطلبة بيدخلوا الجامعة.
7- الفرق بين الطالب المتفوق والأقل منه (الأقل في العالم) يعني مفيش متفوق قوي .. ومتأخر قوي.
8- 93% من الطلبة بيخلصوا الثانوي (High school)، أعلى 17.5% من أميركا.
9- 43% من الطلبة بيدخلوا مدارس مهنية.
10- طلبة المدارس الإبتدائية بياخدوا راحلة يومية (فسحة) 75 دقيقة. (أميركا 27 دقيقة)، عندنا طبعا مينفعش نحطها في مقارنة، خصوصا لو المدرس قرر يخصصها عشان تلموا الورق أو تنضفوا الفصل.
11- المدرسين بياخدوا ساعتين أسبوعيا علشان يطوروا نفسهم، ومش مسموحلهم يقعدوا في الفصل أكتر من 4 ساعات يوميا.
12- عدد المدرسين في فنلند قد عدد المدرسين في نيويورك بس عدد أقل من الطلبة (600 ألف في فنلند، و1.1 مليون في نيويورك).
13- التعليم (100%) مجاني، مفيش أي مصاريف (نوهائي).
14- الكل المدرسين لازم يكون معاهم Master Degree.
15- المناهج فيها خطوط عريضة بس للدراسة من غير حشو ولا رغي ولا هري.
16- بيختاروا المدرسين من أفضل 10% من الخريجين.
17- مرتب المدرس 29 ألف دولار سنوي (أميركا 36 ألف).
18- المدرس اللي شغال بقاله 15 سنة مرتبه 102% مقارنة بالمهن التانية بنفس سنين الخبرة (أميركا 62%).
19- المدرسين متساويين مع الدكاترة والمحاميين.
20- في 2001 الأطفال هناك إحتلوا المراكز الأولى في ( الرياضيات، العلوم).
التعليم هنا في إنجلترا مش للمستوى ده، بس قوي جداً ولغاية دلقوتي اللي شايفه “أساليب فعالة جدا”. وعلى فكرة التعليم قبل الجامعي مجاني 100%.
* * *
المعرفة…
في رأي هي هدفنا في الأرض ورسالتنا وسبب وجودنا، جايين عشان نوصلها وننشرها ونشاركها مع غيرنا، لإننا من غيرها اجساد خاوية من أي معنى أو هدف، لذلك الْيَوْمَ اللي يعدي عليك من غير ما تتعلم حاجة جديدة، فهو ضاع فعلا منك ولازم تزعل عليه وتعوضه في اللي بعده.
مبتكلمش هنا عن التعليم، لان ممكن يكون في تعليم بس مفيش معرفة، فيه حفظ من غير فهم، وحشو من غير تنفيذ، لان المعرفة مش انك تتعلم حاجة بتتعمل ازاي وبس، لا! المعرفة انك تعرف ازاي وليه وتفهم بدايتها واصلها وهدفها وتنفذها، وبعدين تبتكر وتغير طريقة التنفيذ دي.
To learn, to observe, to apply & to invent.
وده طبعا عكس كل اللي بيحصل في منظومة التعليم “حرفيا”، احنا بنقف عند LEARN وشكرا عشان الامتحان، ولو حاولت تنفذ او تبتكر فهايقابلك منظومة من مدرسين ودكاترة مش عايزين يكون عندك المعرفة دي لأسباب منها السبوبة والاستسهال وطبعا التحكم، بل بيخافوا من اللي عنده معرفة عشان هيقطع عيشهم، ومش هما بس اللي كده لا ده الحلقات الأكبر كمان. واللي هدفها ابقاء كل اللي تحتها محدود ومعزول ومشغول بالحفظ.
عشان تعرف، لازم تتحرر من اي نوع من القيود اي كانت، ما بقولش تتخلى عن حاجة، بس تشيل اي اعتبارات وتطلع تبص من فوق، بعين اللي عايز يفهم.
متسيبش نفسك في المطحنة، واتعلم واعرف وافهم، ومتسيبش ولادك يكبروا فيها، اعمل كل وأي حاجة عشان يخرجوا منها وما يتحولوش لزومبي جديد.
لو دخلت على بروفايلي هتلاقي الـFeatured Photo مكتوب فيها:
“هما بيخافوا من اصحاب المعرفة، وبيتحكموا في اللي معندهمش”.
قلة المعرفة حاجة..
والأمية او مستوى التعليم الضعيف حاجة تانية خالص..
الجهل بالقراية والكتابة او ان واحد مدخلش جامعة في أوقات كتير لا يعني قلة او ضحالة المعرفة، بالعكس جدا، فيه كتير ثقافتهم ومعارفهم وذكاءهم الاجتماعي اعلى وأفضل من كتير متعلمين وواخدين درجات علمية كبيرة.
وفِي الوقت نفسه هتلاقي متعلمين واخدين اعلى الدرجات العلمية وبقر، لا يفقهوا شيء وليهم مواقف واتجاهات بتدل على تأخر عقلي وقلة معرفة، وعن اقتناع.
عشان ده مالوش دعوة ..
المعرفة يعني..
To know, to understand, to observe, to apply & to act accordingly.
في فيلم Enemy، قال Jake Gyllenhaal في دور Anthony:
Control, it’s all about control. Every dictatorship has one obsession and that’s it.
In ancient Rome, they gave the people bread and circuses. They kept population busy with entertainment but other dictatorships used other strategies to control ideas, the knowledge… how do they do that?
Lower education, they limit culture, censor information, they censor any means of individual expression and is important to remember this, that this is a pattern, that repeats itself through out history.
السيطرة..
كل شئ مرتبط بالسيطرة، ده هوس أي ديكتاتورية.. .
فى روما زمان شغلوا الناس بالأكل ومدرجات الرياضات الدموية، علشان يفضلوا مش حاسين.
بس فيه ديكتاتوريات تانية اتجهت للتحكم فى الأفكار والمعرفة.. إزاي؟!
تعليم سيئ، قمع المثقفين، فرض رقابة على المعلومات، مراقبة أى وسيلة تعبير…
مهم قوي انكوا تبقوا واثقين ان ده مبيتغيرش بالوقت وانه اتكرر وبيتكرر عبر التاريخ!
لذلك عايز تعرف وتفهم ويكون عندك معرفة، لازم تقرا وتخرج بقرايتك برا حدود مكانك اي كان فين، متقفلش عقلك ومتسلموش لوسائل إلهاء، خلقها ناس عايزين يتحكموا فيك، عشان ماتشوفش غيرهم.
خلي دورك في الحياة تحصيل المعرفة وتطبيقها ونشرها، يمكن تنقذ بني آدم.
بنحط نفسنا وغيرنا في صناديق، صناديق مقفولة بعقيدة وانتماء وفكر وبنرفض نقبل اي حد غيرنا، ومع ذلك غصب عننا بنشترك مع اللي رافضينهم في حاجات كتير، بس عقولنا معمية ومستخبية ورا حدود الصندوق اللي عايشين فيه.
ده صعيدي.. اصله فلاح.. اصله قاهري.. اصله منوفي.. اصله لبناني اصله امريكاني، اصله بيأيد ده ، اصل شكله وحش، لا ده لونه .. لا ده جنسيته او دينه او مذهبه غيري .
مع اننا عايشين مع بعض، بناكل نفس الاكل وبنشجع نفس النادي، وشايلين نفس الجنسية وبنتشارك نفس التاريخ وبنتكلم نفس اللغة، وممكن اكتب قايمة لا نهائية من الحاجات المشتركة بين المختلفين.
محدش عليه لوم في تصنيف غيره، اللوم الحقيقي ع التعليم والميديا الموجهة واللي هدفها فلوس بس ومالهاش اي دور اجتماعي يذكر، بالاضافة طبعا للعادات والتقاليد.
مفيش جنس بيتولد بصفات اخلاقية معينة، كله بيتولد واحد ومجتمعه اللي بيخليه شبهه.
#التربية_الأخلاقية مش بس في البيت، التربية في المدرسة والتلفزيون وبرامج ومبادرات الحكومة وتعاملها مع شعبها.
التربية بعيد عن العصبية والقبلية والعنصرية.
التربية اللي تفهم الناس يعني ايه تقبل الاخر وعدم الحكم عليه بأي حاجة غير طريقة تعامله معانا.
التربية اللتي تنمي جوا البني ادم دوره المجتمعي، وان الورقة اللي بيرميها في الشارع ليها ضرر حقيقي على مستويات كتير.
التربية اللي تخلينا نقتصد في استهلاكنا واللي تخلينا نفهم ان الكوكب مسؤولية كل بني ادم وان الخلاص الحقيقي في المحافظة عليه واعتماد #الاستدامة.
التربية في دعم العلم واصحابه وتثمين دورهم .
التربية في إرساء العدل، ونشر الفكر التطوعي ومساعدة الغير.
التربية في تحري الخير والاحسان في كل جوانب حياتنا، من اول ولادنا لغاية التفكير في عامل النظافة.
التربية اللي هتبعدنا عن التصنيف، وكراهية الغير بالسمع، والتعميم.
التربية والتعليم قبل اي حاجة.
“يعني استفدت إيه لما عرفت؟!”
ليه لازم تقرا وتتعلم كل يوم حاجة؟
ليه لازم تعرف؟
ما إنت ممكن تبقى زي ناس كتير من بتوع “يعني إستفدت إيه لما عرفت؟!” وتعيش حياتك Peace .. صح؟ …
إنت كده فاكرها Peace بس الحقيقة إنت اتحولت من بني آدم لكرسي، بقيت جزء من قطيع، بقيت مُسير باللي بيدهولك، ومشاركتش في أي حاجة تفيدك أو تفيد غيرك .. ولو حتى كلمة أو فكرة أو محاولة. يعني مالكش عازة!
الحقيقة كمان إنت بتمنع مخك من هدفه في الوجود.. اللي هي التطور!
لو المفكرين والمثقفين والعلماء والباحثين والمبتكرين والمخترعين فكروا كده في أول مراحل حياتهم، مكنناش هنتقدم خطوة وهنفضل عايشين في الكهوف بنصطاد أكلنا ونرجع نلبي نداء الطبيعة في الكهف وشكرا.
لو المؤلفين والمخرجين .. عملوا زيك كده .. ومفيش حد فيهم قرا في العلوم .. وقالك أنا كاتب ولا مخرج بس .. مكنناش هنشوف أفلام زي Interstellar Movie أو Inception أو Gravity ولا كتب وروايات عظيمة …
إتعلموا .. وإقروا واتفرجوا وإعرفوا وقابلوا ناس جديدة.. فككوا م التواكل والكسل وقلة العزيمة والهمة دي .. إقروا في أي حاجة وكل حاجة .. متقفلوش دماغكوا وتقولوا أصل دي عيب وده مش عارف مين وده مش متفق معاه.. أقرا وإفهم .. ومش لازم تقتنع .. المهم تعرف وتشكل فكرك بنفسك.
خصص وقت في يومك تعمل فيه حاجة تفيدك وتغير فيك، ولو حتى الوقت ده يكون ساعة أو نص ساعة أو حتى ربع ساعة. الإصرار على التعلم هيخلق منك “موهوب”… متموتش حب التعلم جواك.
واتفضل اعمل شير بقى.
